2002 eta 2003 artean Mediaset hedabide inperioaren bidez diru beltza deklaratu gabeko enpresetara bideratzeaz erruduntzat jo dute Italiako lehen ministro ohia. Fiskaltzaren arabera, Berlusconiren Mediaset enpresak 280 milioi euroko zerga iruzurra egin zuen 1990eko hamarkadan eta 2000ko hasieran. Delitu gehienek, ordea, preskribatu dute jada, eta urte fiskal bakarreko iruzurra zen epaitzeko gelditzen zena. Delitu horrexegatik, lau urteko espetxe zigorra eta bost urteko inhabilitazioa jarri zion Milango auzitegi batek iazko urrian, eta sententzia bere horretan berretsi zuen bigarren instantziako beste auzitegi batek iragan den maiatzean.
Auzitegia osatzen duten bost epaileak herenegundik aritu dira alde guztien bertsioak entzuten, eta gaur iluntzean eman dute behin betiko epaia. Defentsak absoluzioa eskatu du. Fiskalak espetxe zigorra mantentzeko baina inhabilitazioa 3 urtera jaisteko eskatu du, «lege arrazoiak» direla medio. Azkenean, Auzitegi Gorenak bertan behera utzi du defentsaren helegitea, baina neurri batean soilik: espetxe zigorrari eutsi dio, baina baliogabe utzi du inhabilitazioari zegokiona. Auzi hori Milango auzitegiari itzuli dio, hark kasuaren inguruko erabaki bat har dezan.
Egiaz, espetxera ere ez du joan beharko Berlusconik: bere adina dela medio, etxeko atxiloaldian edo auzolanen bidez kitatu dezake zigorra.
Italiako pertsonarik boteretsuenetarikoak ezagun ditu auzitegiak. 1990eko hamarkadaz geroztik, gutxienez hogei auzitan nahastu dute Berlusconi: besteak beste, alderdiak eta enpresak legez kanpo finantzatzeagatik, mafiarekiko harremana izateagatik eta botere gehiegikeriagatik. Beti luzatu dituzte epaiak; sarri, denbora amaitzeraino. 'Mediaset auziko' inhabilitazio zigorra berretsi izan balute, lehenbiziko aldia zatekeen 'Il Cavaliere' erabaki judizial batengatik agertoki politikotik at geldituko zena. Beste lau auzi zabalik ditu oraindik.
