Bi egunetan gutxienez 33 lagun hil dituzte Iraken, hiru erasotan

Iraken erasoen maiztasuna duela urte batzuetatik honat jaitsi egin den arren, joan den ortziraletik gutxienez 46 lagun hil dituzte hainbat atentatutan. Hildako gehien Bagdadeko Umm al Kura meskitako erasoan izan ziren, igande arratsean. Agintariek 28ra igo dute hildakoen kopurua —horien artean parlamentari bat dago—. Suizida batek gainean zeramatzan lehergailuak zartarazi zituen.

Metodo berarekin bi soldadu hil zituzten atzo Mosulen (Hego Kurdistan). Bakuban, berriz, ekintzaile talde batek kontrol postu bati eraso egin, eta bi polizia eta paramilitar bat hil zituen. Iragan ortziralean hamahiru lagun hil zituzten hiru hiritan.