Bihar gauean astebete beteko da Costa Concordia transatlantikoak Italiako Giglio uhartean hondoa jo zuenetik, eta gaur desagertuta jarraitzen duten bidaiariak aurkitzeko lanei ekingo diete, berriro. Atzo mugitu egin zen ontzia, eta bertan behera utzi behar izan zituzten lan horiek.
Azken bost hildakoak aurkitu dituzten lekuan jarraituko dute besteen bila, eta horretarako lehergaiak erabiliko dituzte, urpekariak orain arte iritsi ezin izan duten lekuetara ailegatzeko. Tentu handiz egingo dute, ordea, ontzia ez dadin gehiago mugitu.
Bitartean, erregaia ateratzeko lanak bihar edo etzi abiatuko dituzte; 2.400 tona inguru ditu, eta adituen arabera geroz eta isurketa arrisku handiagoa dago. Corrado Clini Ingurugiro ministroak aitortu du egoera muturrekoa dela. "Azkar jokatu behar dugu, erlojuaren kontra". Erregai guztia ateratzeko bi edo hiru aste beharko dituztela aurreikusi dute.
