Badira zortzi urte Anna Politkovskaia kazetaria tiroz hil zutela. Tarte hori behar izan dute, ordea, Moskuko epaitegiek zigorraren berri emateko. Hilketagatik auzipetuetako bost lagunetatik bi bizi guztiko kartzelara zigortu dituzte, eta beste hirurak, hamabi eta hogei urte artera.
Fiskaltzak azaldu du oraindik ez dutela argitu nork agindu zuen hilketa baina ikerketak zabalik jarraitzen duela.
Kremlinarekiko oso kritikoa zen Novaya Gazeta-ko kazetaria, eta, hori zela eta, aurre egin behar izan zien etengabeko mehatxu eta jazarpenei. Haren senide eta lagunek gogor kritikatu dute ikerketa, eta "gardentasunik eza" salatu dute. Haien arabera, goragotik heldu zen kazetaria hiltzeko agindua.
