Orain arteko jarrerari eutsi dio beste behin Europako Batzordeak gaurko agerraldian. Adierazpen baten bidez babesa helarazi dio Espainiako gobernuburu Mariano Rajoyri, eta berretsi du "barne arazo bat" dela Katalunian gertatzen ari dena, eta hura "Konstituzioaren baitan" konpondu behar dela.
Bide batez, oharra ere helarazi dio Kataluniari, esanez legearen baitan egindako erreferendum batean indepdenentziaren hautuak irabaziko balu estatu berria Batasunetik kanpo geratuko litzatekeela.
Ordea, Batzordearen irizpidea "batasunaren eta egonkortasunaren aldekoa" dela nabarmendu du Bruselak. "Eskatzen diegu bi aldeei mugi daitezela konfrontaziotik elkarrizketara. Uste dugu Mariano Rajoy gobernuburua gai dela prozesu zail hau kudeatzeko Konstituzioarekiko errespetu osoz eta bertan jasotzen diren oinarrizko eskubideekiko errespetuz".
