Serbiatik Hungariara sartu ostean, handik Alemania eta Austriara jotzen dute iheslari gehienek, eta, horretarako, trena dute garraiobide nagusi. Gaur goizean, ordea, Budapesteko tren geltoki nagusia ixteko agindua eman du Hungariako Gobernuak.
MTI albiste agentziaren arabera, itxi dutenean mila lagun inguru zeuden geltokian, eta Poliziak handik joateko agindu die. Segurtasun indarrek geltokiko sarrera irteerak zaintzen dituzte, paperik gabekoak identifikatzeko asmoz.
Dublingo Itunaren arabera, Hungariako Poliziak hatz markak hartu eta haien asilo eskaera jasotzen badu, hiru urteko epean, eskatzaileek ezin dute Europako beste estatuetara jo laguntza eske.
