Bushi zapata jaurtiki zion kazetaria askatzeko eskatu du legebiltzarkide irakiarren herenak

Irakeko legebiltzarkide multzo bat Muntasser al Zaidi kazetari irakiarra kartzelatik ateratzearen alde dago. Kazetaria abenduaz geroztik espetxean dago, George Bush orduko AEBetako presidenteari, Bagdaden zela emandako prentsaurrekoan zapata jaurti eta "tori txakurra!" esateagatik.

Eskaera 275 legebiltzarkideetatik herenak sinatu du eta Parlamentuko zuzendaritzara bideratu dute. AEBen okupaziopean onartutako Zigor Kodean oinarrituta etorri da eskaera, bertan Fiskaltza Nagusiari prozesu judizial bat eteteko baimena ematen baitzaio, "nazioaren interes garrantzitsuak jokoan badaude".

Dyni Irakeko legebiltzarkideak esan duenez, "kasuak interes publikoa piztu" du. Gainera, "Muntasser al Zaidiren jokabidea Irakeko herriaren sufrimenduaren parekoa" izan zela gaineratu du, "erailketak, jazarpenak eta eskubideen urraketak barne".

Al Zaidik Irakeko Al Irakia telebista katerako egiten zuen lana. Abenduaren 14an, Bagdaden Bushek eman zuen prentsaurrekoan zapata bota zion, Iraken AEBetako militarren okupazioa salatuz, eta hura okupazioaren eta ondorengo txikizioaren erantzule nagusitzat joz.