Chavezen aurka gose greban zen nekazari bat zendu da

Hugo Chavez Venezuelako Gobernuko presidentearen politikaren aurka gose eta egarri greba egiten ari zen lagun hil da bart, Caracasen: Franklin Brito, 49 urteko nekazaria. Honek salatu izan zuenez, Bolivar estatuan zituen lurrak kendu zizkion gobernuak -299 hektarea-.

Haren emazteak eman du heriotzaren berri, eta adierazi du medikuek ez diotela gertaeraz ezer askorik jakinarazi. "Dirudienez, bihotzekoa izan du", esan du alargunak. Nekazaria abuztuaren 20tik Caracas hiriburuko erietxe militarrean koma egoeran zegoen.

Sendiak gogoratu du sei urteko borroka zeramala Britok, eta urte hauetan zortzi gose greba egin dituela. Bitarte honetan askatasuna mugatu diotela salatu du familiak. "Honek ez du esan nahi, ordea, Franklin hil denik. Venezuelako herriak jabegoaren eskubidea, justiziaren aukera, askatasuna eta eskubide humano, indibidual eta kolektiboak izateko borrokan bizi da Franklin".

Iazko ekainean Venezuelako Gurutze Gorriaren tratamendua jasotzen hasi zen Brito, berak eskatuta. Erietxe militarreko medikuekin ez zela fio esaten zuen. 43 kilo pisatzen zituen orduan.

Gobernuak ukatu egin du lurrak kendu zizkiola

Elias Jaua Venezuelako presidenteordeak auziaren inguruan euren aurka "Venezuela eta nazioarte mailako kanpaina" sortu dutela esan du. "Egia desitxuratu nahi izan dute, heriotzarekin gobernuak giza eskubideak urratu dituela esan nahian bezala".

Jauak ukatu egin du Britori lurrak kendu zizkiotela. "Are gehiago: Chavezen gobernua izan zen lurren jabegoaren eskriturak eman zizkiona hari".