Barack Obama AEBetako egungo presidenteak Hillary Clintonen hautagaitza babestu du Alderdi Demokrataren konbentzioko azken egunean. "Itxaropenaren hautagaia" dela esan du, eta azpimarratu du AEBen handitasuna ez dagoela Donal Trumpen eskuetan.
Trumpek ordezkatzen duen Alderdi Errepublikanoaren mezu ezkorraren kontrako bidean hitz egin du Obamak: "AEBak dagoeneko handiak dira, eta indartsuak". Duela 12 urte bere alde egin zuten bezala, orain Clintonen alde egiteko eskatu die alderdikideei: "Itxaropena defendatu duzue azken urteetan, eta hauteskunde hauetan ere nirekin bat egiteko eskatzen dizuet, zinismoa eta beldurra baztertu eta gure onena ateratzeko". Azpimarratu du berak ezagutzen duen herrialdea ausarta dela, baikortasunez betea, eta eskuzabala.
Clintonen hautagaitza goratu du, eta esan hura "borrokalaria, estatu andrea, ama, amona, zerbitzari publikoa eta abertzalea" dela.
