Clintonek arnasa hartu du Ohio, Rhode Island eta Texasko primarioak irabazita

Atzoko primarioak garrantzi handikoak gertatu dira AEBetako hauteskunde prozesuan: batetik, Alderdi Errepublikanoko presidentegaia John McCain izango dela argitzeko balio izan dute, eta gainerako hautagai errepublikanoak bazter batera uzteko. Izan ere, Ohio, Rhode Island, Vermont eta Texasko primarioetan irabazita, konbentzio errepublikanoan presidentegai izendatua izateko behar diren 1.191 ordezkariak bildu ditu.

Alderdi Demokratan, ordea, nahasiago geratu dira gauzak: Hillary Clintonek irabazi du Ohio, Rhode Island eta Texasen -Vermonten, berriz, Obamak-, eta, ondorioz, arnasa hartu eta presidentegai demokrata izateko aukerak berreskuratu ditu. Barack Obamak aurretik jarraitzen du, ordezkari gehiago bilduta, baina, hala ere, hari aurrea hartzeko aukerak ditu oraindik Clintonek. Aldiz, primario horiek Obamak irabazi izan balitu, lehiatik kanpo geratuko zen Clinton.

Nolanahi ere, Alderdi Demokratako zenbait sektoretan kezka pizten ari da Obama eta Clintonen arteko lehia gogorra. Gehiegi luzatzen ari dela uste dute, eta borroka irudi horrek azaroko hauteskunde nagusiei begira John McCain hautagai errepublikanoari egin diezaiokela mesede.