Ez dira emaitza ofizialak, baina zerrendaburuek eurek ere ontzat eman dituzte, eta porrota onartu du CSUko Bavierako buru Markus Soederrek. Batasun Sozial Kristauak landerreko bozak galtzen dituen bigarren aldia da honakoa, aurrekoa 1962an izan zen.
Botoen %35,5 iragartzen dizkiote inkestek CSUri, eta kolpea Berlinen ere nabaritu dute. Izan ere, Angela Merkel kantzilerraren gobernukidea da alderdia, eta Barne ministro karguan da Horst Seehofer alderdiburua. Dena den, iragarri du alderdian dituen kargu guztiei eustea dela bere asmoa, nahiz eta porrotak "ondorioak" izango dituela onartu.
Aldiz, pozik dira Alemaniarentzako Alternatiba eskuin muturrekoak, izan ere botoen %11 lortu dituzte bozetan, eta beraz, ordezkaritza izango dute landerreko legebiltzarrean. Era horretan, eta Hesseko landerrean ez beste lander guztietan ordezkaritza izanik, oposizioko alderdi nagusia dira eskuin muturrekoak.
