Egiptoko armadaren eta manifestarien arteko liskarrak baretu egin dira

Egiptoko hauteskundeen bigarren faseko bigarren itzulia egin zuten atzo, eta bertako iturrien arabera, herritarren parte hartzea oso baxua izan da. Iragan ostiralean Tahrir plazan hasitako armadaren eta ekintzaileen arteko borrokak, dena den, lasaitu egin dira; azken bost egunetan, baina, hamalau lagun inguru hil eta milatik gora zauritu dituzte armadako soldaduek eta Poliziak.

Bestetik, milaka emakume kalera atera ziren asteartean Kairon, iragan larunbatean Tahrir plazan soldaduek jo eta biluztu zituzten andrazkoek jasandako tratua salatzeko. Junta Militarrak ere erasoen aurrean «atsekabeturik» dagoela adierazi du, eta herrialdeari egonkortasuna itzuliko dioten proposamenak aztertzeko borondatea azaldu. Herritarrek, ordea, protestak leuntzeko eta nazioarteko irudia hobetzeko estrategia moduan ikusi dute militarren jarrera, ez dutelako ardurarik onartu.