Otegik ohartarazi du "erregimena salbatu nahi duen bloke atzerakoiak" indarrak batu dituela "kontraerreforma" baterako. "Askatasun nazionalak eta autogobernua murriztuko dituzte, eskubide demokratikoekin batera". Hala, "erantzukizun politikoz" jokatzera deitu ditu erabakitzeko eskubidearen aldeko eragileak. "Demokrazia, gure herriaren burujabetza eta autodeterminazio eskubidea defendatzen dugunok elkar hartuta jokatu beharko genuke".
EH Bilduk nabarmendu du egoera horri ezin zaiola "anbiguotasunetik" erantzun. Otegiren esanetan, euskal gizarteari "argi esan behar zaio ez dagoela aldebikotasunerako tarterik, ez bada berdintasunetik egiten". Eusko Jaurlaritza sostengatzen duen EAJren eta PSE-EEren arteko akordioari, eta EAJren eta PPren arteko harremanei ere erreferentzia egin die Otegik. Haren iritziz, "testuinguru honetan, 155. artikulua indarrean jartzen duten edo defendatzen duten indarrekin ezin da aliantza politikarik egin".
Bestalde, Espainiako Estatua "demokratizatzeko" aukerarik ez dagoela adierazi du Otegik. PP, PSOE eta Ciudadanosek osatutako "blokeak" hori "ezinezko" egiten du, haren hitzetan.
Koalizioak elkarlanerako deia egin die 155. artikulua ezartzearen aurka dauden indar politiko sozial eta ekonomikoei. "Ditugun ezberdintasunak alboratu eta egoerak eskatzen duen maila eman behar dugu". EH Bildu "elkarrizketarako guneak" bilatzeko prest dagoela gaineratu du Otegik.
Azkenik, EH Bilduk iragarri du Kataluniari elkartasuna eta babesa adierazteko ekintzak antolatuko dituela hurrengo egun eta asteetan.
