Recep Tayyip Erdogan Turkiako lehen ministroak AKP Justizia eta Garapena alderdi islamistaren babesa izango du hauteskundeetan. Hala iragarri du Ankaran Mehmet Ali Sahinek, AKPko goi kargudunak.
Oposizioko bi alderdi nagusiek, CHP Herritar Errepublikanoen Alderdiak eta MHP Mugimendu Nazionalistak, Erdogani aurre egiteko hautagaia adostu dute: Ekmeleddin Ihsanoglu. Idazlea eta diplomazialaria da; ez da inongo alderditako kide.
Apirilean eginiko udal bozetan, probintzia gehienetan gailendu zitzaien AKP Herritar Errepublikanoen Alderdi sozialdemokratari eta eskuin muturreko MHP Mugimendu Nazionalistari.
Urtebete da hirigintza proiektu baten aurkako protesta Turkiako dozenaka hiritara hedatu zenetik. Erdoganen eta gobernuko AKPren aurkako mobilizazioak bilakatu ziren; Istanbulgo Gezi parkea izan zuten erdigune.
