Alkate eta gobernadore ugarirekin egindako bilkuran, Dilma Rousseff Brasilgo presidenteak aitortu du herrialdeak duen egoera "zaila" dela, eta gaineratu du erreforma politikoaren eztabaida sarri sartu eta atera dela parlamentuko eztabaidetatik. Plebiszituaren bidez, herrialdeko hainbat hiritan izan diren protestei erantzuna eman nahi die Rousseffek.
Brasilgo Konstituzioak aintzat hartzen du plebiszituaren formula, baina 1993. urteaz geroztik soilik bi aldiz erabili dute. Urte hartan, 1889an baztertutako monarkia berrezartzearen aurka bozkatu zuten. 2005. urtean, berriz, arma salerosketa debekatzearen kontra bozkatu zuten.
Rousseffek esan du plebiszitua ustelkeriari aurre egiteko proposatzen duela, besteak beste. Diru publikoarekin zerikusia duten delituak "askoz gogorrago" zigortu nahi ditu. Halaber, "akordio nazional" bat eskaini du, erreforma politikoaz gain, zerbitzu publikoak, garraioak, osasun publikoa eta hezkuntza hobetzeko.
