Eskozia herrialde independentea izatearekin ados al zaude? Hori izango da 2014ko erreferendumean eskoziarrek erantzun beharreko galdera, gaur Alex Salmond lehen ministroak iragarritakoaren arabera. "Gure etorkizuna da, gure aukera", esan du. Edinburgon eman ditu azalpenak.
Salmondek, dena dela, azaldu du devo max aukeraren alde egiten duela; alegia, Erresuma Batuarekin bandera, monarkia eta defentsa partekatzen segitzearen aldekoa dela.
2014ko udazkenean izango da galdeketa, eta Eskozian bizi diren 16 urtetik gorako lagunek edukiko dute parte hartzeko aukera. "Eskoziaren azken 300 urteetatako erabakirik garrantzitsuena izango da", adierazi du lehen ministroak.
Urte hasieran David Cameron Erresuma Batuko lehen ministroak aurrea hartu nahi izan zion Eskoziako Gobernuari kontsulta egiteko proposamena eginez, baina hori egiteko baldintzak ezarrita: galdera bakarra eta "argia" egitea, eta kontsulta 2013ko ekaina baino lehen burutzea.
2014a urte sinbolikoa da Eskoziarentzat, Bannockburneko batailaren 700. urteurrena beteko baita. Gudaldi hartan garaipen garrantzitsua lortu zuen Ingalaterraren aurka, Eskoziaren independentziaren gerren barruan.
