Nazio Batuen Erakundeko idazkari nagusi Ban Ki-moonek txalotu egin du Sudanen eta Hego Sudanen artean lortu duten akordioa, eta bi herrialdeei eskatu die "espiritu positiboa" mantentzeko, horrek eraman baititu elkarren arteko akordio horretara.
Pasa den ostiralean sinatu zuten bi herrialdeek kolaboraziorako ituna. Horren arabera, bi gobernuek konpromisoa hartzen dute bata bestearen burujabetasuna errespetatzeko, baita elkarren barneko auzietan ez sartzeko ere. "Indarraren erabilera bazter dezaten eskatzen zaie, eta oraindik konpondu gabe dituzten auzietan akordioa lortzeko dei egiten zaie", dio Ki-moonek argitaratutako oharrak.
Hego Sudanek uztailean lortu zuen independentzia; hala ere, oraindik hainbat gaietan akordiorik lortu gabe jarraitzen du Sudanekin.
