Hacker batek eraso egin dio gaur FARC Indar Armatu Iraultzaile Kolonbiarrekin lotura duen webgune bati, eta hark armak uzteko aukera baztertzen ez duela zabaldu du. Adierazpen hori ezagutu ondoren, egiazkoa ote den zalantzan jarri dute zenbaitek, tartean Juan Manuel Santos Kolonbiako presidenteak eta Piedad Cordoba Kolonbiako senatari ohiak. Cordobak "apokrifotzat" jo du, eta "arraroa" egin zaio dokumentuaren "ortografia txarra". Ondoren, webguneak berak baieztatu du hacker baten ekintza izan dela.
Adierazpen horretan, ustez FARCek "leiho bat zabalik" ikusten zuen armak uzteko, bakerako lege esparru bat sortuz gero.
Kolonbiako Parlamentuko ordezkariek maiatzaren 15ean onartu zuten bakerako lege esparru bat finkatzen duen proiektu bat; horrek herrialdeko legez kanpoko talde armatuekin negoziatzea ahalbidetzen du. Diputatuek baiezkoa eman zioten proposamenari, aldeko 126 botorekin eta aurkako laurekin.
Proiektua Senatura eramango dute orain.
