Juan Manuel Santos Kolonbiako presidenteak atzo iragarri zuen hilabete batez eten egingo dituztela FARCen kontrako bonbardaketak. Neurri horrekin, Habanako negoziazioei bultzada eman nahi die Kolonbiako Gobernuak, eta 2012an hasitako bake prozesua bizkortu. Duela aste batzuk Nazioarteko Zigor Auzitegiko Fiskaltzak babesa adierazi zion Kolonbiako bake prozesuari.
Hilabete igaro ostean, gerrillak joan den abenduan iragarritako su-etena betetzen ari ote den aztertuko dute berriz. Santosek esan du, orain arte, betetzen ari direla emandako hitza.
Hala ere, ez dituzte etengo ELN gerrillaren kontrako bonbardaketak; aitzitik, areagotu egingo dituzte. Izan ere, gobernuaren arabera, beren "delituzko ekintzak" ez dituzte bertan behera utzi.
Santosek ez du argitu nola bereiziko dituzten bi gerrillen eremu geografikoak bonbardaketetan.
