Laurent Fabius Frantziako Atzerri ministroak adierazi du Maliko iparraldea "berreskuratzeko" nazioarteak militarki parte hartu beharko duela hurrengo asteetan, eremu hura Al-Qaedarekin lotutako taldeen eskuetan dagoela iritzita. "[Parte hartzea] Lehenbailehen bada, hobe", esan du Fabiusek France2 telebista katean.
Haren arabera, hilabete barru-edo NBE Nazio Batuen Erakundean bozkatzeko plan bat aurkeztuko dute erakundeko herrialdeek, eta han erabakiko lukete Malirako zer neurri hartu. Batetik, Maliren "boterea politikoki indartzeko" mekanismoak zein liratekeen zehaztuko lukete, eta, bestetik, militarki nola parte hartu erabakiko lukete.
Jean Yves Le Drian Frantziako Defentsa ministroak, dena dela, ez du datarik eman nahi izan beste elkarrizketa batean. "Ez litzateke komenigarria izango [datak ematea]", esan du France Inter irrati katean. Baina operazioa "beharrezkoa" dela adierazi du. "Armekin, drogarekin eta pertsonekin trafikatzen duten ehunka fundamentalista daude han, taldeetan antolatuta".
Le Drianek dio Al-Qaedak babesten dituela talde haiek eta, ondorioz, Maliko iparraldea Afrikarentzat eta Europarentzat mehatxu bihurtzen ari dela.
Afrikako herrialdeekin elkarlanean aritzeko itxaropena agertu du Defentsa ministroak.
