Frantziako Legebiltzarrak baiezkoa eman dio erretreten erreformari

Gaur egun, 40 urtez kotizatu behar dute Gizarte Segurantzan sektore pribatuko langileek erretreta osorik jaso nahi badute, eta, funtzio publikokoek, berriz, 37,5 urte. Jean-Pierre Raffarin Frantziako lehen ministroak gobernuak proposatutako erreforma gauzatzen bada, 2020tik aurrera 42 urtez kotizatu beharko dute behargin guztiek, arlo pribatukoek zein publikokoek. Dena den, aldaketa aldika-aldika aplikatuko da, eta urtez urteka joango da kotizatu beharreko epea luzatzen.

Erretreten erreformak eztabaida handia piztu du Frantzian. Sindikatuek, adibidez, manifestazio eta greba asko egin dituzte egitasmoaren aurka. Halaber, Frantziako Legebiltzarrean izan den eztabaida inoizko handienetakoa izan da: PSk, PCRk, Berdeek eta ezkerreko osterantzeko alderdiek eskura zituzten baliabide parlamentario guztiak erabili dituzte proiektua atzera botatzeko; besteak beste, 11.000 zuzenketa inguru aurkeztu dizkiote proiektuari.

Ondorioz, 1981etik diputatuen ganberan izan den eztabaida luzeena izan da erretreten inguruko hori: 18 egunetan banatutako 155 ordu iraun ditu guztira.

Hala ere, proiektuaren aldekoak erraz nagusitu dira Legebiltzarrean. Orain, Senatuak onartu behar du, baina han ere eskuinak du gehiengo zabala, eta, beraz, arazorik gabe onetsiko da. Gero, Legebiltzarrera itzuli behar du berriro, diputatuek behin betiko onespena eman diezaioten. Uztailaren 20rako tramite horiek guztiak amaituta edukitzea espero du Frantziako Gobernuak.