Frantziaren eta Espainiaren arteko mugan Schengengo Ituna etenda dago egunotan

Espainiako Gobernuak Schengengo Ituna eten du behin-behinean, Ipar Kataluniaren eta Hego Kataluniaren artean. Europako Banku Zentrala bilera egitekoa da Bartzelonan etzi, eta, horregatik, mugako kontrola berrezarri du Madrilek atzoz geroztik. Poliziak autoak gerarazi zituen atzo mugaldean, eta Gironan auto ilara handiak eragin zituen. «Istiluak eragin ditzaketen antisistemen sarrera saihestea» da behin-behineko neurriaren helburua, Madrilen arabera. Europako Batasunean herritarren mugimendu askatasuna bermatzen du Schengengo Itunak.

Mugek, hain zuzen, pisu handia hartu dute Frantziako hauteskunde kanpainan. «Muga barik ez dago naziorik, ez estaturik, ezerrepublikarik, ez zibilizaziorik», esan zuen igandean Sarkozyk.