Gazako blokeoa gainditzen ahalegintzea, baina, batez ere, hura salatzea zuen helburu Zaytouna ontziak, eta lortutzat eman dute xedea bertan zihoazen hamahiru emakumeek. Izan ere, esperotakoa gertatu da, alegia, Israelgo armadak ontzia atzeman du hura Gazako kostaldera heldu baino lehen, eta atxilotu egin ditu bertan zihoazenak. Ordea, preso hartutakoen artean Mairead Maguire 1976ko Bakearen Nobel sariduna egoteak azkar zabaldu du albistea sare sozialetan.
Rassemblement à #Madrid en soutien à #WomenToGaza🇵🇸suite à l'interception du bateau #Zaytouna par la marine de l'occupation#FreedomFlotillapic.twitter.com/BCioOXHX1Q
— Campagne Palestine (@CRPalestine) 2016(e)ko urriak 5
Gertatutakoa salatu eta ekintzaileak aske utz ditzatela eskatzeko, nazioarteko kanpaina bat jarri dute abian Women's Boat to Gaza ekimeneko kideek. Ontzia atzeman aurretik grabatutako hainbat bideo egin dituzte publiko, eta horietan ekintzaileek eskatzen diete ikusleei idatz diezaietela euren gobernuei haiek askatzeko esku har dezaten.
Iluntzean zen iristekoa ontzia Gazako kostaldera. Ordea, Tel Avivek geldiarazi egin zuen itsasontzia, eta Ashdodeko portura eraman. Iturri ofizialek jakinarazi dutenez, portua eremu militar izendatzen dute halako kasuetan.
Orotara ontzian hamahiru emakume zihoazen arren, horietatik bi, Al Jazeera-ko kazetariak, etxerako bidean dira jada. Aldiz, gainontzekoen aurka urruntze agindua ezarri du Israelek, eta bi aukera eman dizkie: agindua "boluntarioki" sinatu eta etxera itzultzea, edo prozedurari uko egin eta justiziara jotzea.
