Lukas Papadimos Greziako lehen ministroak iragarri berri du Greziako Parlamenturako hauteskundeak aurreratu egingo dituztela, eta maiatzaren 6an izango direla. NET telebista kateak eman du horren berri.
"Parlamentua desegiteak ez du esan nahi zuek lan egiteari utziko diozuenik. Gauza asko ditugu egiteke hauteskundeen aurretik", azaldu die Papadimosek ministroei.
Ministroen Kontseiluko bileraren ondoren, Karolos Papulias Greziako presidentearekin bildu da Papadimos. Papuliasi dagokio Parlamentua desegitea eta hauteskundeetara ofizialki deitzea.
Inkestek Demokrazia Berria alderdiari ematen diote garaipena, baina gehiengo absoluturik gabe. Haren atzetik geratuko litzateke Pasok eta Alderdi Komunista.
