Jose Efrain Rios Montten aurkako epaiketa daraman Jazmin Barrios epaileak argi esan du: jeneralaren aurkako epaiketak segitu egingo du, Guatemalako genozidioa ez da epaitu gabe geldituko. Gaur goizean, prozesua etenarazteko agindu du beste epaile batek, baina Barriosek baliogabe utzi du ebazpen hori.
Martxoaren 19tik ari dira Rios Montt epaitzen, de facto-ko agintari zela gertatutako sarraskien erantzule izateaz akusatuta. Rios Montt estatu kolpez heldu zen boterera gerra zibil betean, eta hamazazpi hilabetez agindu zuen. Tarte horretan, batez beste, egunero 800 hilketa gertatzen ziren herrialde osoan: biktimetako asko indigenak ziren. Horregatik, fiskaltzak genozidioa leporatzen dio: zehazki, ixil etniako 1.711 indigenen hilketen ardura.
Gaur goizean, prozesuan atzera egitea agindu du Carol Patricia Flores epaileak, 2011ko azaroan zegoen fasera. Izan ere, Guatemalako Auzitegi Gorenak prozesuaren tramite bat berrikusteko eskatu dio, defentsaren eskaerei kasu eginda. Rios Montten abokatuak behin baino gehiagotan saiatu dira epaiketa atzeratzen. Azken asteotan, Guatemalako kargu militar eta politiko zenbaitek ere eskatu dute prozesua bertan behera uzteko; Otto Perez Molina, Guatemalako egungo presidentea, ere nahastu dute auzian, eta gogor egin du haren kontra.
NBE Nazio Batuen Erakundeak ere azpimarratu du prozesuak daukan garrantzia, Navi Pillay Giza Eskubideen goi mandatariaren bozeramaile baten ahotik. Izan ere, lehenengoz epaitu behar zuten estatuburu ohi bat genozidioagatik bere herrialdeko auzitegi batean. "Arlo horretan, Latinoamerika aurretik doa munduan. Horregatik, hain garrantzitsua den kasu bat etetea oso tristea litzateke".
