Turkiatik irten eta Greziara heltzea zen haien asmoa, baina Egeo itsasoan hondoratu dira haien ametsak, eta biziak. Orotara hemezortzi iheslari hil dira itsasoan, Turkiako Didim hiritik gertu; beste hamabost bizirik atera dituzte. Urte hasieratik 321 iheslari irentsi ditu Egeoak.
Kontinentera iristea lortu dutenek, ordea, ez dute egoera askoz hobea. Mazedoniako muga zeharkatzea gero eta zailagoa da gerratik eta heriotzatik ihesi doazenentzat. Orain, Greziarekin muga egiten duen herrialdeak erabaki du ez dituela onartuko Irak eta Siriako etorkinak, baldin eta euren jatorriko herri eta eskualdeetan "gatazka armaturik" ez bada. Hala, Damasko, Homs eta Bagdadeko errefuxiatuek ezin izan dute muga igaro.
Greziako agintarien arabera, joan den astearen amaieran 13.000 ziren dagoeneko Mazedoniako mugan harrpatuta geratutako migratzaileak.
Europako Batasuneko eta Turkiako agintariek goi bilera egitekoa dute bihar, errefuxiatuen auziaz hitz egiteko.
