Newtown-eko Poliziak emandako lehen datuen arabera, bi lagun sartu dira Connecticuteko ikastetxe batean, armatuta, eta tiroka ekin diote ume eta helduen aurka. Tiroen ondorioz, gutxienez 27 lagun hil —haietako 18 haurrak dira— eta dozenaka zauritu dira. Erasoa goizeko 9:40an gertatu da (Euskal Herriko 15:40ak aldera). Hainbat lekukoren arabera, ikastetxeko zuzendaria eta psikologoa ere hil dira, tiroen ondorioz.
Poliziak emandako lehen informazioen arabera, haur eta helduei tiroka ekin dien erasotzaileetako bat hil egin da. Oraindik ez dute argitu Poliziak berak hil duen edo bere buruaz beste egin duen. Zauritu ugari Connecticuteko Danburyko ospitalera eraman dituzte. Ospitalak agiri bat kaleratu du, baina zaurituen egoeraren berri ez du eman.
Hedabide batzuen arabera, Poliziak erasorako erabili dituzten bi pistola atzeman ditu. Oraindik ez dute argitu nola sartu diren erasotzaileak ikastetxe barruan, eta ea zerikusirik duten ikastetxearekin. Poliziak ere ez du argitu zein arrazoirengatik gertatu den erasoa, baina bai zehaztu du tiro egileak ez direla eskolako ikasleak. Hain zuzen ere, AEBetako ikastetxeetan izandako antzeko azken bi erasoetan —Columbineko insitutuan eta Virginako Tech Unibertsitatean— tiro egileak hango ikasleak ziren.
