Gutxienez hamabost dira Kandaharko atentatuan hildakoak

Kandaharko Poliziaren arabera, bonba tranpa bat izan da. Izan ere, minutu batzuk lehenago beste lehergailu txikiago batek egin du eztanda, eta gertakari horrek erakarrita, jende asko hurbildu da bonba handia jarrita zegoen ingurura. Jendetza bildu denean —ondoko eskola bateko haurrak ziren inguratuko direnetako asko— zartatu da lehergailu handia. Ondorioz, hamabost lagun hil dira eta 50 bat zaurituta daude. Gainera, zaurituetako batzuk oso larri daude, eta litekeena da hildakoen kopurua handitzea.

Eztanda gertatu eta segituan, Afganistango zein AEBetako armadetako soldaduek inguru guztia hesitu dute.

Konstituzioa onartu eta bi egunera

Azkenaldian, eraso asko ari da gertatzen Afganistan hegoaldean, Kandahar inguruan. Atzo, esate baterako, Nazio Batuen Kandaharko errefuxiatu agentziaren egoitzaren zaintzaileei egin zieten eraso, tiroka eta granadak jaurtiz. Afganistango egungo Gobernuaren eta AEBen arabera, Talibanen aldeko erresistentziak egiten ditu atentatu horiek.

Izan ere,Kandahar 2001ean AEBetako indarrek egotzi zituzten arte Afganistanen agindu zuen Talibanen mugimenduaren sorlekua izan zen, eta, era berean, haien aldeko erresistentziaren gune nagusietakoa da egun.

AEBen ekimenez Talibanen erregimena desegin eta Mendebaldearen babesaz egun Afganistanen agintzen duen Gobernuak duela bi egun jarri zuen indarrean Konstituzio berria. Dena den, gerra egoera bizi da oraindik Afganistango leku askotan, Kandaharren eta inguruetan, kasu.