Orduko 275 kilometrorainoko haize ufadak izan dira Filipinetako hainbat lekutan, Hondamendien Kudeaketarako Batzordeak jakinarazi duenez. Iturri horren arabera, gutxienez hiru pertsona hil dira bart gauean. Horietako bat Lingigen hil da, Hego Surigaon, zutoin batek jota. Beste biak elektrokutatuta hil dira, linea elektriko bat gainera erorita.
Gutxienez 125.000 lagun mugiarazi dituzte herrialdearen erdialdean, eta gobernuak egokitutako 109 zentrotan daude. Hala ere, espero da kopuru horrek gora egitea datozen orduetan. Manila hiriburutik 600 kilometrora igaro da ekaitza, eta, beraz, ez du eraginik izan bertan.
Filipinetan 04:30 inguru zirela (21:30 Euskal Herrian) iritsi da Haiyan tifoia Filipinetako kostaldera, Guiuanen. Argindarrik gabe utzi du Ekialdeko Bisayak eskualdea, eta aurten mundu osoan izandako ekaitzik gogorrena dela baieztatu dute. Adituen arabera, inoiz lurrera iritsi den ekaitzik gogorrena izan daiteke.
Hogeita bat probintzia alerta gorrian daude.
