Gutxienez sei lagun hil dituzte Pakistanen atentatu suizidan

Beste atentatu suizida bat egin dute gaur Pakistanen, Rawalpindi herrian, eta gutxienez sei lagun hil dira eta hamalau zauritu. Pervez Musharraf Pakistango presidentearen eta armadaburuaren egoitza militarretik gertu egin dute erasoa.

Atentatuaren egileak Karchehri Chowk gunean eztandarazi du lehergailua, kontrol postu bateko poliziak hura miatzera zihoazela, iturri ofizialen arabera. Armadaren Etxetik kilometrora izan da gertaera, eta hantxe du egoitza militarra Musharraf jeneralak.

Hildakoen artean hiru polizia behintzat badaude, eta zaurituen artean, besteak beste, emakumeak eta haurrak. Pakistango Barne Sailak esan du bere ustez atentatuaren helburu poliziak zirela.