Haurtzarotik

Ume oro sortzen da garatzeko ahalmen batekin; duen ingurunearen arabera garatuko du, edo bidean geratuko da». Santiago Cueto ikertzailearen hitzak dira. The Lancet aldizkariak argitaratu berri duen ikerketa batean parte hartu du. Ikerketa horretan ondorioztatu dute bost urtetik beherako 219 milioi umek ez dutela gaur egun behar adinako garapen kognitiborik. Munduko herrialderik behartsuenetan egindako ikerketa da, eta kasurik larrienak Asian eta Saharaz hegoaldeko Afrikan ikusi dituzte.

Pobrezia, elikadura eskasa, eta ingurukoen partetik arreta murritza. Horiek dira haurren garapen urriaren atzean atzeman dituzten motibo nagusiak. Elikadurari dagokionez, iodo eta burdin falta izaten dute sarritan haurrek, eta horrek eragotzi egiten du beren garapen egokia. Amarengatik jasotako eritasunek ere aztarna lagatzen dute sarritan. GIB birusa, esaterako, ohikoa da. Malariak ere ume asko erasaten ditu, ondorio larriekin.

Eragina izaten du umeen bilakaeran gurasoen ikasketa eta formazio mailak ere. Eta baita haien osasun egoerak ere. Amen depresio kasuek sarritan ondorio larriak lagatzen dituzte haurrengan. Betierekoak.

Haurasko, gainera, ez diraeskolara joaten. Eskolarako adina duten umeen artean 99 miloi ez dira joaten. Joaten direnen artean, gainera, soilik %78k lortzen dute oinarrizko ikasketak burutzea.

Ikerketako arduradunek programak eskatu dituzte gosea eta pobrezia arintzeko. Eta baita gehiago ere. Etxeetako giroa hobetu eta haurrekin jolas egiten erakutsi behar zaie gurasoei. Umeak ondo elikatzeko gakoak irakatsi behar zaizkie. Eta haurrekin jolas eta irri egiteko bideak ere bai.

haurrik behartsuenak

HERRIALDEA UME KOPURUA

India 65 milioi

Nigeria 16 milioi

Txina 15 milioi

Bangladesh 10 milioi

Etiopia 8 milioi

Indonesia 8 milioi

Pakistan 8 milioi

Kongoko Errepublika 6 milioi

Uganda 5 milioi

Tanzania 4 milioi