Hondurasko Hauteskunde Auzitegi Gorenak goizaldean eman du boto zenbaketaren azken datua. %54,47 zenbatuta Juan Orlando Hernandez Alderdi Nazionaleko hautagaia da kontaketan aurretik, zenbatutako botoen %34,25ekin. Hauteskunde auzitegiak argi utzi nahi izan du datu horrekin ezin dela esan oraindik hautagai kontserbadoreak irabaziko dituenik atzoko hauteskundeak. Jainkoari eskerrak emanez eta otoitz eginez hasi du bart hauteskunde gaua Hernandezek.
Bigarren Xiomara Castro Libre ezkerereko alderdiko hautagaia da. Manuel Zelaya estatu kolpe baten bidez kendu zuten presidentearen emaztea indartsu sartu da politikan alderdi berriarekin, eta botoen %28,77 jaso du. Hasieran, ordea, hauteslekuak itxi eta berehala, zundaketen lehen datuekin, presidentea bera izango dela iragarri du. Ondoren lehen emaitzak jakin direnean Zelayak ez dagoela ados salatu du, eta Ricci Moncada Libre alderdiko ordezkariak iruzurra salatu du.
Botoen zenbaketaren erdia eginda bi hautagaiek diote irabazleak direla. Parte hartzea handia izan da, eta hori bera nabarmendu du Europako Batasuneko ordezkari Ulrike Lunacekek. Atzoko hauteskundeak estatu kolpeaz geroztik presidentea aukeratzeko egin diren lehenengoak dira. Hondurasen bigarren itzulirik ez dago, eta irabazleak hartuko du Porfirio Lobo presidentearen lekukoa.
