Yariv Oppenhaiemer erakundeko bozeramaileak astelehenean plazaratuko duen txostenak datu zehatzagoak jasoko ditu, baina, dagoeneko, kritika soka luzea eragin du errealitate horrek. Gassan Khatib PAN Palestinako Aginte Nazionaleko eleduna izan da aurrenekoa praktika horren inguruko iritzia ematen. Zenbakia «asaldagarria» dela adierazi du, eta, agerian uzten duela bake prozesuarekiko konpromiso falta. «Israelek negoziazioak serio hartzen ez dituen beste erakusle bat da, okupazioa amaitzea ekarriko lukeelako horrek».
NBE Nazio Batuen Erakundearen Ekialde Hurbilerako ordezkaria ere kezkatuta agertu da. Robert Serryren arabera, kolonizazio politika horrek urratu egiten du nazioarteko legedia, eta, nazioarteko komunitateak behin eta berriz egindako aldarrikapenen kontrako norabidean doan dinamika da. Baldintza horietan negoziazioetarako beharrezkoa den konfiantza zapuztu egiten dela uste du Serryk. Eta abagune horretan mintzatu da Jimmy Carter ere. Ameriketako Estatu Batuerako presidente izandakoaren hitzetan, «arabiar gutxiengoarekiko» jarrera «kezkagarria» du Israelek; eta bide horretatik jarraituz gero, estatu demokratiko gisa duen sinesgarritasuna galtzeko arriskua du.
Amore eman gabe
Israelek, baina, amore eman ez, eta bere asmoei eutsi die, bake prozesua kolokan jartzen badu ere. Mark Regev Israelgo Gobernuko bozeramaileak esan du kolonien politikak ez duela zertan negoziazioetan eragin, auzi horrek «ez baitu bake akordioa baldintzatzen» helburua ez delako «kokaguneak amaitzea», baizik eta «bakeakordio historiko bat adostea». Haren hitzetan, une honetan auzi guztiak daude mahai gainean, kolonien «auzizaila» tartean. Jerusalem ekialdean beste 238 etxebizitza eraikitzeko baimena eman berri izana ere ez du uste arazoa denik. Barack Obamaren gobernua «etsita» agertu zen orduan, bera sustatzen ari baita bake prozesua, eta palestinarrek uko egin diote negoziatzeari kolonietan eraikitze lanak bertan behera utzi artean. Zuzeneko negoziazioak, hain zuzen ere, debekua indarrean zela abiatu ziren, hogei hilabetez etenda egon ostean; baina une honetan etenda daude berriz ere.
Bada, ordea, debekua indarrean egon zen garaian eraikuntzak eten izana zalantzan jartzen duenik ere. Dauood Hamude Banaketa Hesia Gelditu gobernuz kanpoko erakundeko kideak salatu duenez, lau mila etxebizitza eraiki dituzte hamar hilabete horietan, eta oso nabarmena izan da hori, errepideak, lantegiak eta bestelako azpiegiturak ere eraiki dituztelako. «Zisjordaniako metro koadro bakoitzeko borroka dago palestinar eta israeldarren artean».
Zisjordanian eraikitako ehun kolonietan milioi erdi bat kolono bizi da gaur egun -legez kanpoko koloniak ere badaude, hau da, baimenik gabe eraikitakoak-.
