Ekintzaile suizida batek zerbitzugune bati eraso dio gaur goizean Pakistanen, Faisalabad herrian, Punjab probintzian, eta gutxienez hogeita bost pertsona hil eta 80 zauritu ditu; horietako hogei oso egoera larrian daude. Polizia iturriek jakinarazi dutenez, ekintzaileak lehergaiz betetako auto batekin zerbitzugunearen aurka jo du. Auto asko omen zeuden une horretan.
Zerbitzuguneak autoentzako gasa eskaintzen du, eta, leherketaren ondorioz, erabat txikituta geratu da. Express telebista kateak azaldu duenez, zerbitzugunearen inguruetan armadaren hainbat bulego daude, baita ISI Pakistango zerbitzu sekretuenak ere. Ez dute baieztatu, ordea, horiek zirenik ekintzailearen helburu.
Azken astean hainbat eraso izan dira Pakistanen, zehazki ipar-mendebaldean, eta gaurkoak zenbatu gabe, 36 pertsona hil dira. Poliziak Pakistango talibanei eta talde islamistei leporatzen dizkie atentatuak. 2010. urtean 2.113 eraso izan ziren Pakistanen, herrialde horretako Bakerako Ikasketa Institutuak jakinarazi duenez.
