Europako Batzordeak gaur iragarri du Hungaria Europako Batasuneko Justizia Auzitegira eramango duela, datuen babesaz arduratzen diren agintaritzen independentzia ez errespetatzeagatik eta epaileen erretiratzeko adinaren legearengatik. Hala jakinarazi du Olivier Bailly bozeramaileak.
Urtarrilean hiru zigor prozedura ireki zizkion Europako Batzordeak herrialdeari, Konstituzioko hainbat puntu "Europako Batasuneko zuzenbidearekin bat ez datozela" argudiatuta. Lege horiek Banku Zentralaren, Justiziaren eta datuen babesaz arduratzen diren agintaritzen independentzia "arriskuan" jartzen zutela adierazi zuten EBko 27 komisarioek.
Europa Batzordeak uste du erretiratzeko adina 70 urtetik 62 urtera aurreratuta epaileen %10 eta notarioen %25 aurten erretiratuko litzatekeela lanean jarraitu nahi duten erabakitzeko eskubidea izan gabe. Horregatik, legearen aplikazioa bertan behera uzteko eskatu du, Europako Justizia Auzitegiaren epaia ezagutu arte.
Dena den, Europako Batzordeak onartu du Hungariak Banku Zentralaren independentzia errespetatzeko hartutako konpromisoa, eta horregatik "auzi ixteko prest" egongo litzatekeela adierazi du.
Zigor prozedura horiek ireki zizkiotenean Hungariak Europaren eskariak beteko zituela agindu zuen.
