Gutxienez 87 pertsona hil dira Errusian, Itsaso Beltzaren ertzean, Kuban eskualdean sortutako uholdeetan. Errusiako Gobernuak jakinarazi duenez, larrialdi zerbitzuek alerta egoeran jarraitzen dute, eguraldi zerbitzuen arabera euriteek berdin jarraituko baitute. Gelendzhik hirian, esaterako, inoizko uholderik larriena pairatu dute azken orduetan.
Krimskiko barrutia izan da orain arteko kaltetuena; 76 gorpu topatu dituzte erreskate zerbitzuek eta bost mila etxebizitza urak estalita geratu dira. Gainerako hildakoak Gelendzhiken aurkitu dituzte. Horretaz gain, 90.000 pertsona argindarrik gabe egon dira ordu askoan, elektrizitate zutoin bat erori eta bost pertsona elektrokutatuta hil ostean. Desagertutakoak ugari dira; tartean, bederatzi urteko neska bat eta erreskate lanetan ziharduen polizia bat.
Errusiako Barne Ministerioak jakinarazi du Gelendzhiken bakarrik zazpiehun kide eta ehun ibilgailu ari direla salbamendu lanetan.
