Inkestek iragarri bezala, Independentzia alderdi kontserbadoreak irabazi ditu Islandiako Legebiltzarrerako hauteskundeak, botoen %29,1 eskuratuta. Ordea, ez du gehiengo absolutua lortu, eta akordioak lortu beharko ditu gobernuan jarraitzeko.
Erreforma alderdia, Independentzia alderdiaren adar europazalea, bosgarren indarra izan da botoen %10,4 jasota. Bien eta Alderdi Progresistaren arteko akordioak bihur lezake Bjarni Benediktsson Islandiako Finantza ministroa gobernuburu.
Alderdi Progresista zentristarekin batera gobernatu dute kontserbadoreek. Baina alderdi horren babesak behera egin du, botoen %11,5ekin laugarren indarra izateraino. Panamako paperetan Sigmundur David Gunnlaugsson lehen ministro ohia agertu izanak eragin du alderdiaren babesa urritzea.
Alderdi Piratak %14,4 boto jaso ditu; 2013ko hauteskundeetan izandakoak halako bi, baina inkestek iragarritakotik urrun.
Emaitza horiekin, dimisioa eman du Sigurdur Johannsson lehen ministroak: "Konstituzioarekin bat eginez, dimisioa aurkeztu diot Gudni Johannesson presidenteari, nahiz eta hark eskatu didan karguan jarraitzeko gobernu berria osatu arte".
