Gero eta egun gutxiago falta dira Katalunian Diada ospatzeko, eta, aurten, egun nazionala irailaren 27ko hauteskunde kanpainaren abiapuntu ere izango da. Bartzelonako Meridianan mobilizazio jendetsua egingo dute egun horretan, ANC Kataluniako Biltzar Nazionalak eta Omnium Culturalek antolatuta.
Plazaratutako azken datuen arabera, 360.000 herritar inguruk eman dute izena mobilizazio horretarako, eta ostiraleko Diadara bitartean beste 125.000 batzea da antolatzaileen helburua.
Bozei begira, independentistek gehiengoa lortuko dutela iragarri zuen atzo El Periódico egunkariak inkesta batean, eta joera bera erakutsi du gaur El Mundo egunkariak argitaratutakoak. Horren arabera, Junts Pel Si eta CUP zerrenda independentistek 70 eta 74 eserleku lortuko dituzte Kataluniako Parlamentuan —68 ordezkaritan dago gehiengo osoa—; 62-65 aurrenekoak eta 8-9 bigarrenak.
Hauteskundeei plebiszitu izaera eman die Artur Mas Kataluniako Gobernuko presidenteak, eta izaera hori aitortu dute inkesta horretan galdetutakoen %50,4k.
Kataluniaren "berezitasuna"
Unionismoaren aldetik, Kataluniarentzat zer proposamen egin ere eztabaidagai da. Felipe Gonzalez Espainiako Gobernuko presidente ohiak proposatu zuen nazio gisa aitortzea Katalunia. Pedro Sanchez PSOEko idazkari nagusiak baztertu egin du aukera hori, baina, horren ordez, Espainiako konstituzioan Kataluniaren "berezitasuna" aitortzearen alde agertu da.
