Astelehenean, turistek bete beharreko zenbait gomendio azaldu zituen Mahesh Sharma Indiako Kultura eta Turismo ministroak: "Gauez ez ateratzea, gonarik ez janztea eta autoren batera igotzekotan matrikularen argazkia lagunei bidaltzea". Ministroak aipatutako gomendiook aireportuetan jasotzen dituzte turistek, "ongi etorrirako kutxa" baten barruan.
Kazetariek galdetuta, esandakoak zehaztu zituen Sharmak: "Nire asmoa ez zen janzkera arautzea, erlijio ohiturak ezberdinak direla oroitaraztea baizik. Gurtza toki batzuetan burua estali behar da, beste batzuetan zapatak erantzi". Azalpenak azalpen, polemika eragin zuten ministroaren adierazpenek, eta oposizioak gogor kritikatu zuen. Sare sozialetan ere gehien aipatutako gaia izan zen astelehen goizean.
Prentsaren aurrera irten behar izan du ministroak, eta azaldu du "erlijio tokiak" baino ez zituela aipatu, eta "kezkak eraginda" hitz egin zuela: "Bi alabaren aita naiz, eta inoiz ez nioke esango emakume bati zer jantzi behar duen eta zer ez".
Azaldu du "herrialde askok" ematen dituztela janzkeraren gaineko gomendioak, eta ez zuela inoren janzkera arautzeko asmorik.
