Hego Koreako eta AEBetako gobernuekin bildu baino egun batzuk lehenago ezagutarazi du neurria Kim Jong-un Ipar Koreako presidenteak. Bere gobernuak eten egingo ditu arma nuklearren eta kontinente arteko misilen probak. Atzo jakinarazi zien bere alderdikideei, Langileen Alderdiaren Komite Zentralaren bileran.
Horrez gain, Ipar Koreak itxi egingo ditu herrialdearen iparraldean proba nuklearretarako dituen guneak, "proben etetearen gardentasuna bermatzeko". Hala azaldu du herrialdeko KCNA albiste agentziak.
Nazioarteko hainbat eragilek txalotu egin dute Piongiangen erabakia. "Aurrerapen esanguratsua" da neurria, Hego Korearen esanetan, penintsula arma nuklearrik gabe gune bihurtzeko. Seulek adierazi du proben etetea "oso positiboa" izango dela Koreako bi estatuen arteko eta Piogiangen eta AEBeen arteko bilera "arrakastatsua izan dadin".
Proben etetea ospatu egin dute Europako Batasunak, Japonek, Txinak, Erresuma Batuak, Errusiak eta NBE Nazio Batuen Erakundeak ere.
