Ali Akbar Salehi Irango Atzerri ministroak salatu du herrialde batzuen aldebakarreko zigorrek "nazioarteko legeak urratzen" dituztela, baina horrek herrialdeari ez diola eragingo ohartarazi du.
Salehi Didier Burjalte Suitzako Atzerri ministroarekin bildu da, eta "garrantzitsutzat" jo ditu bi herrialdeen arteko harreman politiko, ekonomiko eta kulturalak. Horrekin batera, AEBetan espetxeratuta dauden Irango presoen zerrenda helarazi dio Burjalteri, eta horientzako beharrezko laguntza eskatu dio.
AEBek, bestetik, "marra gorri argiago eta zorrotzagoak" jar ditzake Irango mehatxu nuklearraren aurrean, Wall Street Journal egunkariaren arabera. Neurri hori martxoaren 5a baino lehen har dezakete AEBek, Barack Obama presidentea Benjamin Netanyahu Israelgo lehen ministroarekin bildu aurretik.
Egunkariaren arabera, Israelek AEBei eskatzen die Irani baimenduko dizkioten pausoak zeintzuk diren zehazteko, eta Israelgo Gobernuak "presioa" eragin die AEBetako funtzionarioei argi utz dezan "aukera guztiak mahai gainean" daudela.
