Tentsioa haziz doa Iran eta Saudi Arabiaren artean, Al-Nimren hilketaren ondoren. Igandean, hainbat lagunek su eman zioten Saudi Arabiak Iranen duen enbaxadari, eta bart gauean istiluak izan dira Al Auamiyan, hildako kleriko xiitaren sorterrian. Liskarretan gizonezko bat hil dutela jakinarazi du Poliziaren bozeramaileak.
Saudi Arabiako gutxiengo xiitaren elizgizon nagusietako bat hil izanak Al-Saud dinastiaren kontrako protesta gogorrak piztu ditu gehiengo xiita duten inguruko herrialdeetan —Bahrain, Iran, Irak, Libano eta Yemenen—, eta baita Saudi Arabian xiita gehien dauden Qatif eskualdean ere. Iranek ohartarazi du Riadek "garesti" ordainduko duela Al-Nimrren heriotza, eta hainbat herrialdetako xiitek gatazka sektarioa hauspotzea leporatu diote Saudi Arabiari.
Islama bi adar nagusitan banatuta dago VII. mendean Mahoma profeta hil zenetik, eta egun inoiz baino biziago dago bien arteko zisma, banaketa geopolitiko baten adierazle ere badelako. Saudi Arabia da suniten taldeko burua, eta Iran xiitena. Horregatik, exekuzioek haserrea piztu dute gehiengo xiita duten estatuetan.
