Israelgo armadak Gaza (Palestina) bonbardatu du bart, Al Qassam brigaden kontra egiteko, Israelek berak jakinarazi duenez —Hamasen beso armatua da Al Qassam—. Maghazi iheslarien gunera bota ditu bonbak, Gaza erdialdean, eta, oraingoz, Palestinak ez du esan inor hil edo zauritu den. "Inguruan kaosa eta panikoa" dagoela adierazi du.
Israelek dio Gazatik bertatik palestinarrek suziri bat jaurti zutela aurretik bere lurraldera. "Ez dugu onartuko herritarrak eta soldaduak zauritzeko saiorik, eta terroristen kontra jarraituko dugu", dio Israelgo armadak. Eraikinik eta jenderik ez dagoen leku batera erori zen aipatutako suziria.
