Italiako Lampedusa uhartera 1.300 etorkin ailegatu dira 24 ordutan

Afrika iparraldeko herrien erreboltak lehertu zirenetik, milaka lagunek ihes egin dute Italiako Lampedusa uhartera, Europan sartzeko helburuarekin. Azken 24 ordutan 1.300 lehorreratu dira —uharteak 6.000 biztanle ditu—. Italiako agintarien arabera, Tunisiatik ailegatu dira gehienak. Roberto Maroni Barne ministroak uste du gertakari horrek Italian sortutako «alarma» justifikatzen duela. «Libia sutan dago, Tunisiak ezin du bere muga kontrolatu eta Egipto larriagotzen ari da». Muammar Gaddafik estu hartu nahi izan du Europa, argudiatuz bere erregimena eroriz gero Europa osoa «beltzez beteko» dela. NBEk adierazi du Libian Saharaz hegoaldeko «ehunka mila» langile daudela harrapatuta.