Italian, lehia uste baino estuagoa izan da Matteo Renzi lehen ministroaren PD Alderdi Demokratikoaren eta Beppe Grilloren M5S Bost Izar Mugimenduaren artean, baina azkenean alde erosoa atera dio PDk: proiekzioen arabera, Renziren alderdiak botoen %41,4 inguru lortu ditu, iazko hauteskunde orokorretan baino gehiago —ordukoan, %29,5 lortu zituen, Pier Luigi Bersani zerrendaburu zuela—. M5Sk, berriz, %22,4 inguru jaso ditu, iazko bozetan baino gutxixeago.
Iraganeko emaitzetatik urrun geratu dena Silvio Berlusconi lehen ministro ohiaren Forza Italia izan da. Zundaketen arabera, botoen %15,7 artean baino ez ditu bildu; iazko otsailean, boto gehien jaso zituzten alderdien artean bigarren izan zen haren PDL Askatasunaren Herria koalizioa, botoen %29,1 lortuta, eta oso gutxi falta izan zitzaion PD garaitzeko.
