Karolinska institutuak gaur jakinarazi duenez, John B. Gurdon eta Shinya Yamanaka ikertzaileek jasoko dute 2012ko medikuntzako eta fisiologiako Nobel saria. ”Zelula helduak pluripotente bihurtzeko birprogramatu daitezkeela” frogatu dutelako sarituko dituzte bi ikertzaileak.
John B. Gurdon Ingalaterrakoa da, eta 79 urte ditu. Oxfordeko Unibertsitatean egin zuen doktoretza 1960an, Cambridgeko Unibertsitatean dihardu gaur egun, Gurdon Institutuan. Shinya Yamanaka, berriz, Osakan sortu zen, Japonian, 1962an. Kyotoko Unibertsitatean ari da lanean gaur-gaurkoz.
