Erasmo Pinilla Panamako Hauteskunde Batzordeko presidenteak izendatu du Varela hauteskundeetako garaile. Jose Domingo Ariasi (%32,04) eta Juan Carlos Navarrori (%27,47) nagusitu zaie Varela. Presidenteordea zen, eta Ricardo Martinelli egungo presidentea ordezkatuko du karguan. 2009an batera aurkeztu ziren hauteskundeetara, baina harreman gatazkatsua izan dute Martinellik eta Varelak. Hautesleen %78k eman dute botoa.
"Gaur Panamak irabazi du", esan du Varelak emaitzen berri izan ostean. Herritarrei babesa eskertu die, eta hauteskunde batzordea zoriondu du. 2019ra arte izango da Varela presidente.
CD Aldaketa Demokratikoa eskuineko alderdi ofizialistako hautagai Ariasek eta PRD Alderdi Iraultzaile Demokratikoko Navarrok Varelaren garaipena onartu dute. Ariasek iragarri du "oposizio eraikitzailea" egingo duela. Navarrok, berriz, herritarrei zorionak eman dizkie, hauteskunde eguna liskarrik gabe igaro delako.
