Erresuma Batuko epaile batek Julian Assange Wikileakseko sortzailea Suediara estraditatzeko erabakia hartu du gaur. Ustez sexu delituak egin zituelako hartu du erabaki hori, eta, BBC telebista kateak jakinarazi duenez, bi aldeei eman die horren berri. Howard Riddle epailearen hitzetan, ez dago Suedian epaiketa justua ez duela izango pentsatzeko arrazoirik. Assangek orain zazpi eguneko epea du helegiteak aurkezteko.
Suediako fiskaltzak hiru sexu gehiegikeri delitu eta bortxaketa bat leporatzen dizkio Assangeri, bi emakumek jarritako salaketan oinarrituta. 2010eko abuztuan gertatu ziren ustezko delituak. Assangeren defentsak, estradizioa aztertzeko auzian, salatu zuen sexu delituak lekukorik gabe epaitzen direla Suedian, eta azpimarratu zuen herrialde horretatik gero AEBetara bidal dezaketela eta han traizioagatik exekutatu dezaketela Wikileaks webgunean zabaldutako informazioagatik.
