Juan Manuel Santos Kolonbiako presidenteak izenpetu du galdeketara deitzeko dekretua. Gobernuko ministroek lagunduta, Santosek nabarmendu du galdera "argia eta erraza" dela: "Ez dago nahasteko aukerarik. Galdera ez da kolonbiarrek bakea nahi duten edo ez, akordioa babesten duten edo ez baizik".
Galdera argituta "bakerako beste pauso bat" eman dutela azpimarratu du Santosek: "Kongresuari esker, gehiengoz eta inoiz baino azkarrago onetsi du plebiszituaren deialdia". Eta erantsi du: "Plebiszitua errealitate bat da orain".
Astelehen gauerdian sartu zen indarrean FARC Kolonbiako Indar Armatu Iraultzaileen eta Kolonbiako armadaren behin betiko su etena, 52 urteko gatazka amaitutzat joz. Orain, erreferendum bidez onetsi beharko dute bake akordioa herritarrek. Galdeketan, baiezkoak botoa ematera deituta daudenen %13ren babesa jaso beharko du; gutxienez, 4.396.626 boto.
