FARCek bart jakinarazi duenez Kolonbiako Gobernuaren eta talde gerrillariaren arteko bake negoziazioa urriaren 15ean hasiko da. Rodrigo Granada negozioaziorako taldeko kideak Habanan eman zuen atzerapenaren berri, eta oharra FARCek eta Kolonbiako Gobernuak sinatu dutela esan zuen. Oslon izango dira negoziazioak.
Abuztuan adostu zuten bake negoziazioak hastea, mende erdiz borrokan aritu ostean. Urriaren 17an bertan agerraldi publikoa egingo dute bi aldeek Norvegiako hiriburuan. Abuztuko iragarpena egin zutenerako sei hilabete zeramatzaten hizketan. Negoziazioan Kuba eta Norvegia zaintzaile lanetan ariko dira, eta Txile eta Venezuela, laguntzaile gisa.
Santos, prostata minbiziarekin
FARCek hori iragarri eta ia aldi berean Juan Manuel Santos Kolonbiako presidenteak jakinarazi du prostatako minbizia duela. Bihar Bogotan egingo diote ebaketa, eta tumorea kenduko diote. Iragarpena irratiz eta telebistaz zabaldutako mezu baten bidez egin du. 61 urte ditu. Aurreko asteko Nazio Batuen Erakundearen bileran egin zuen biopsia Santosek, New Yorken, eta medikuaren aholkuz egingo du ebaketa.
Santosek ez du presidentetza utziko, ordea; Santosek berak "deseroso" hitza aipatu du ebaketaz hitz egiterakoan, eta uneoro presidente funtzioetan izango dela aurreratu du.
